galegoxdocentes

Recursos educativos en galego

2011-12-19T00:51:00.002+01:00

Esta fin de semana celebráronse en Compostela, na Facultade de Educación, as IV Xornadas sobre Recursos educativos en galego. Especialmente adicadas este ano ao bacharelato. A organización desta actividade quixo invitarme a facer unha pequena comunicación. Velaí vos deixo a presentación que utilicei.

Recursos educativos en galego (habelos hailos...)

Publish at Calaméo or browse others.

http://www.usc.es/fcce/bacharelato_2011.pdf

Aprender facendo

2010-10-20T11:40:00.002+02:00

As linguas, como o resto dos saberes, das capacidades, das actitudes... aprendémolas no uso. Queres ensinar a ler, a escribir, a conversar? Procura que o teu alumnado lea, escriba e converse.

Semella un conto de Perogrullo!

Seica hai cousas que damos por feitas; ás veces son as máis importantes de todas.

En galego tamén se fai ciencia

2010-06-01T10:49:00.005+02:00

Este vídeo pertence a unha campaña moi interesante. Na web da mesma tes máis información sobre os personaxes que nel falan. Son profesoras e profesores universitarios do ámbito científico e de universidades europeas e mesmo dos EEUU.

En galego tamén se fai ciencia from En galego tamén se fai ciencia on Vimeo.

O que me resulta especialmente suxestivo é a naturalidade e a tranquilidade que amosan as súas palabras. Para elas e para eles, que traballan no máis alto nivel científico, as linguas supoñen unha riqueza e un valor para quen as coñece. Nunca un problema.

Unha fermosa lección!

Pedagoxía e metodoloxía

2010-01-25T13:23:00.000+01:00

A importancia de escoitar ben

2010-01-25T02:00:00.001+01:00

Mira ben!

2010-01-25T01:56:00.000+01:00

Cámbiache o conto

2010-01-25T01:14:00.002+01:00

Shift Happens

View more presentations from Jeff Brenman.

O crego "axuda de escritorio"

2010-01-24T23:39:00.000+01:00

Galego para o profesorado en prácticas

2009-10-14T01:58:00.004+02:00

Velaí estamos de novo. A piques de comezar os cursos de galego para o profesorado que está a realizar a súa fase de prácticas neste curso. Noraboa a todos e a todas.

Desde esta bitácora, que naceu como ferramenta de apoio para estas actividades, seguiremos a incorporar todo canto nos parezca de interese en dúas liñas fundamentais:

- Facilitar o uso do galego no ensino (de todas as áreas e materias)

- Fornecer de recursos para o ensino en lingua galega (especialmente os recursos on-line)

Falaremos destes asuntos nas vindeiras semanas.

Uxío

2009-07-04T15:21:00.000+02:00

Ao fin, as letras galegas adícanse ao poeta do Courel.
2010 ano de Novoneyra

A escola das areas

2008-12-15T18:28:00.003+01:00

Hoxe, namentras daba unha volta pola sempre sorprendente bitácora de SechuSende, topei esta curta que me pareceu que tiña que vos traer. Merece a pena a historia, o seu fondo e a súa forma.

Plastilina, lingua, Frei Martín Sarmiento e, de fondo, Pontevedra...

Fantástica. E hai moito máis neste: Cineclube do audiovisual galego "Flocos.tv"

Visítao!

Recursos para o galego

2008-11-26T00:31:00.003+01:00

Coñecemos estes días nos cursos de galego para profesorado en prácticas un recurso moi completo e elaborado. É un traballo do colectivo Tagen Ata, lingua e comunicación, colaboradores/as nestas actividades de dinamización lingüística. Procede dun traballo feito para a Deputación de A Coruña e contén unha grande cantidade de recursos para o uso do galego en diferentes ámbitos (diccionarios, traductores, compendios gramaticais, recursos multimedia, etc.). O mellor é a súa organización, clara e intuitiva.

Un traballazo, e moi útil. Recoméndovos unha visita a este sitio.
Pola miña parte, deixarei a partires de xa, una ligazón a este lugar na barra da dereita. Toda unha honra, porque está reservada para o máis interesante.

Visitade esta web en http://www.recursosparaogalego.com ou premendo na imaxe superior.

Recursos para a atención ao alumnado inmigrante

2008-11-18T17:26:00.004+01:00

Topei na web de contidos este dicionario visual, moi intuitivo, agradable e sinxelo. Coido que podería ser unha ferramenta, un recurso para achegar á lingua a nenos e nenas que non a coñezan. Semella de moito interese ir preparando recursos para a atención lingüística do alumnado non galegófono "en galego".
Resulta que, por defecto, escollemos a lingua castelá como lingua primeira e, no caso do ámbito educativo, isto non é o máis adecuado. Ás veces por costume, non sempre a causa de prexuizos lingüísticos. Ás veces pode ser por unha sinxela cuestión de recursos.
Pois imos traballar para que isto non suceda. Velaí vai un! o dicionario visual interactivo!
Está moi ben.
Se coñeces máis recursos para a atención ao alumnado que non coñece o galego, coméntanolo que os publicamos de contado.

As linguas no sistema educativo galego

2008-11-04T19:57:00.004+01:00

Falamos destes asuntos na primeira sesión dun dos grupos de traballo: as linguas no sistema educativo galego. O feito do plurilingüismo, o modelo, os modelos de ensino bilingüe, as vantaxes desta opción e as implicacións didácticas que conleva.
Fixemos referencia a este traballo da área de normalización lingüística da Universidade de Vigo. É unha aportación de moito interese. Resulta do máis aconsellabel dar unha volta por esta web.
E podes comentar que che pareceu. Iso engadiría un valor a este foro.
Adiante cos comentarios.

Non falo o galego porque non o sei falar ben...

2008-11-03T10:34:00.001+01:00

Se cadra é cousa de probar. A ver como vai...

galegoxdocentes 2008

2008-10-08T00:27:00.003+02:00

Comezou o novo curso e con el chegan as datas de facer este curso de "Galego para o profesorado en prácticas" que foi o xermolo deste caderno colaborativo. Coido que este ano imos darlle un novo alento a esta bitácora. Hai moitos asuntos que tratar:

Uso do galego no ensino

O tratamento integrado das linguas nos centros

A dinamización lingüística

A nova normativa

e, como non?

Os múltiples recursos multimedia e on-line cos que contamos para o traballo educativo "en e para o galego"nas distintas áreas e materias.

Falaremos decote nestas vindeiras datas

Letras galegas

2008-05-15T13:11:00.003+02:00

Recursos multimedia disponibeis en internet.
Coma sempre, na blogue do compañeiro Antón Vicente Rodríguez atoparedes varias posibilidades.
Pero, de todas elas, salientaremos este pequeno xogo interactivo realizado por Toño coa ferramenta que resultou premiada hai uns meses polo proxecto SIEGA, no apartado de ferramentas de autor. O proxecto Xogamos.
Fran Macías, Felo Couto e Antón Vicente son os responsabeis desta aplicación que fai posible a creación de exercicios multimedia interactivos coma este que vos presento.
Unha aportación máis para estes días.

Letras galegas

2008-05-15T11:10:00.005+02:00

Xoaíña é unha proposta didáctica realizada por profesorado do CPI O Progreso, de Catoira.

A profesora Marisel, que anda este ano a voltas coas novas tecnoloxías e o traballo das competencias básicas, foi quen de artellar toda unha secuencia didáctica baseada na poesía de Álvarez Blázquez.

Esta proposta, apropiada para traballar co alumnado de primaria, conta con actividades variadas que rematan nun obradoiro de escrita. Inclúe un traballo multimedia que recrea un poema "Maruxiña", tirado do poemario "Rosario do teu mencer", con música, texto e imaxes.

Recoméndovos que visitedes a web do CPI e botedes unha ollada ás propostas didácticas para infantil, primaria e secundaria. Hai bo traballo e haberá máis.

Preme para visitar a web dinámica do CPI O Progreso de Catoira.

Letras galegas

2008-05-09T13:36:00.003+02:00

Poema de X.M. Álvarez Blázquez, autor homenaxeado no día das letras deste ano 2008.
Atopeino nunha fantástica blogue: "O Recanto de Mik". Unha bitácora de animación e fomento da lectura dun colexio, o CEIP Mestres Goldar de Vigo. Magnífica, chea de contido interesante e moi dinámica.
Recomendo vivamente visitar este recanto de Mik. Boísima.

Letras galegas

2008-04-28T12:51:00.005+02:00

Logo comeza o mes de maio e se achegan as letras. Vaia por diante un agasallo para quen o queira. Este é un tipo de letra que se facilitou hai tempo. Podédelo engadir aos vosos PCs polo sinxelo método de colocar o seguinte arquivo na carpeta "fonts" dentro da carpeta "windows", que á súa vez está dentro do disco duro do voso equipo.
A partires desta operación estará disponible nos vosos procesadores de texto este tipo de letra baseado en antigos textos escritos galegos.
Letras galegas...

Novo dicionario de galego on-line

2008-04-24T13:09:00.003+02:00

Ir indo presenta un novo dicionario. É a versión on-line da súa obra lexicográfica, pioneira na recollida de todas as modificacións das Normas Ortográficas e Morfolóxicas do idioma galego, aprobadas pola Real Academia Galega o 12 de xullo de 2003.

Foi presentado onte, día do libro e xa logo leva 3000 entradas.

Unha ferramenta para ter en conta.

Quen secuestrou o "Galicia Hoy"?

2008-02-29T11:39:00.007+01:00

Hoxe, na edición dixital de El País, atopamos este magnífico artículo de Manuel Rivas.

Disque se non aprendemos da Historia, estaremos condeados a ver como se repite. Atentos á loita de Isaac Díaz Pardo e a este episodio de Historia repetida. Atentos ás aventuras e creacións galegas do exilio. Atentos á Historia para que non se reproduza.

Le o artículo premendo nesta ligazón.

NOVA VERSION DO FACIL EN GALEGO

2008-02-27T12:31:00.002+01:00

Joaquim Fonoll, o autor da Factoria de Actividades Combinadas de Informática e Língua (FACIL), envíanos a ligazón á version 2.3 en galego (Febreiro) que agarda solucione os problemas atopados e simplifica a instalación.

FACIL
http://www.xtec.net/dnee/facil/gal/instal_facil2_gal.exe

Apertas, TADEGa.net

Un dicionario moi especial

2008-02-08T00:31:00.000+01:00

A tecnoloxía wiki é unha das propostas máis suxestivas na actualidade. Xa son referencia obrigada as diversas enciclopedias baseadas neste soporte colaborativo e aberto. Proporciona contornas de participación ceibe e altruista de gran valor e máximos niveis de actualización.

Velaí tendes o Galizionario, un dicionario galego colaborativo e gratuíto de significados, etimoloxías, pronuncias e citas. Ten arredor de tres anos de vida e conta xa cunhas 17000 entradas. Vai camiño de ser unha ferramenta moi útil.

Prestarache participar nalgunha entrada, non é? Imos deixar a nosa pegada, que non se diga!

Ferramentas lingüísticas para o galego

2008-02-07T03:07:00.000+01:00

Muito interesante!

Software libre e lingua. Mancomun.org é unha web da que temos falado e que vencella á Consellería de industria coa de Educación nun proxecto realmente importante, o desenvolvemento de iniciativas que fomenten a inserción das novas tecnoloxías no mundo do ensino e, especialmente vencelladas á lingua galega mediante o uso de software aberto.

Pois ben, botade un ollo a esta listaxe de ferramentas para o uso do galego. Creo que hai moito material e ben interesante. Fixádevos nos proxectos de traducción de software libre (en proceso do que chaman "localización" a galego) no que podedes - e eu volo aconsello e vos animo - participar persoalmente. Estas son cousas do proxecto de "traducción colaborativa ENTRANS" do que falaremos de contado.

Ben por estas ferramentas. Imos ir utilizándoas e, a ver que tal van.

Investigación sobre as TICs no ensino en Galicia

2008-02-07T02:40:00.000+01:00

Veño de recibir interesantes novas sobre un grupo de investigación da Universidade de Santiago que traballa sobre a integración das novas tecnoloxías nos procesos de ensino-aprendizaxe. Semella unha tentativa de achegamento á escola por parte da Universidade, moito de agradecer.

Coordinados pola profesora Lourdes Montero e integrado por profesorado de diversos ámbitos e especialidades, semella interesante a súa tarefa. Mesmo veño de visitar a web que manteñen e na que se poden ver algunhas interesantes propostas tales como a aplicación squeak (con toda unha visión das TIC no ensino detrás) e a non menos interesante web de recursos variados que denominan Morea (aínda que todavía resulta difícil de acceder en galego, que é o asunto prioritario neste caso). Hai máis cousas e - sobre todo - hai comunidade de intereses polo que estaremos moi atentos ás súas creacións e aportacións.

Podedes visitar a web deste grupo Stellae. Semella ben encamiñado.

Rumbo a Bucarest: máis premios

2008-02-07T02:26:00.000+01:00

Imos camiño de coñecer outro premio interesante para estes nosos profesores de galego e TICs. Esta vez é para Belén Junquera, que resultou finalista para un premio europeo, para proxectos e-twinning este ano. O seu proxecto, en lingua estranxeira, leva por título Kids h@nd in h@nd e resulta moi suxestivo.

Coido que estas propostas de irmanamentos escolares mediados por esta ferramenta chamada e-twinning poden resultar de interese tamén para o desenvolvemento de proxectos globais ou interdisciplinarios en lingua galega. Están pensados para o traballo internacional,co que a tendencia máis potente é a vehiculación mediante o inglés ou mesmo o castelán, francés, etc. pero non exclúe outras linguas.

Haberá que estudar esta ferramenta, outra máis.

E noraboa a Belén e moita sorte por Rumanía. Xa nos contará.

Máis sobre os proxectos e-twinnig

GOOGLE EN GALEGO (total!!)

2008-02-05T21:57:00.000+01:00

Xa está aquí!!! Por fin chegou a nova versión do Google. Esta vez completamente en galego.
Aproveita e utiliza toda a potencia do buscador máis famoso do mundo na nosa lingua.

Isaac, amigo, o pobo está contigo!

2008-01-25T10:18:00.000+01:00

Isaac resiste... e quen resiste, gaña!

Así como salientamos os premios e recoñecemos as innovacións que desenvolven os nosos profes, hoxe gustaríame sinalar dun modo moi especial o traballo e esforzo dun deles.
Velaí o tendes (ollade o vídeo) ao pé do canón, como todos estes días. Loitando xunto a Isaac Díaz Pardo, por él, polo seu legado cultural histórico, pola nosa cultura e quizais por defender unha causa xusta, non máis nin menos.
Este calvario arrepiante que transita o vello Isaac semella unha metáfora triste: David contra Goliat; trae á miña memoria aquel rapaz chinés, miúdo en pé, só, fronte á ringleira xigante de máquinas militares, na praza de Tiananmen (unha imaxe histórica inesquecibel). Isaac Díaz Pardo amosa unha magnífica forza interior, unha fera capacidade de loita, e neste caso, o inimigo é tamén xigante, inmenso, unha ringleira de enormes máquinas de destrucción: a cobiza, a ignorancia, a ruindade, a traizón, mesmo a cobardía...

Son tempos de xestos. Algúns son quen de dar un paso adiante.

Parabéns Sechu.

Como cada ano: o Salón do Libro Infantil e Xuvenil.

2008-01-22T16:08:00.000+01:00

Velaí temos de novo a semana do "Salón do libro infantil e xuvenil" de Pontevedra. Sempre hai cousas que ver, escoitar e ler... arredor dos libros, as lecturas, animación, teatro, música, espectáculos, contos, poesía, ilustracións, e que sei eu máis cousas. Este ano adícase ao MAR.
Hai que visitar este salón!

Vaixa o programa de espectáculos e actividades para nenos/as e maiores. Os docentes teñen opcións especiais.

Unha pizarra dixital interactiva a 60€?

2008-01-21T19:20:00.000+01:00

Participan nesta bitácora moitos dos mellores creadores de software e recursos educativos de Galicia. Pero aínda quedan outros moitos que procuraremos coñecer.
¿que vos parece este para empezar?

Jose Manuel Bouzán: mestre en Palmeira, no CEIP de Palmeira, un colexio punteiro en moitos ámbitos desde hai anos. Pois ben, a web do colexio de Palmeira (premiada no seu día co primeiro premio ás webs de centros) é un sitio cheo de magníficos recursos para o traballo docente. Nesta web, atoparedes - entre outras cousas - o museo virtual, o proxecto de medio ambiente, e por suposto, poderedes entrar na casa do "rato paco", onde atoparedes cadernos e actividades por áreas e etapas. Todo un mundo de recursos.

Os máis destes recursos están elaborados co programa ARDORA. Esta é unha aplicación creada por Bouzán e disponible e gratuíta na rede.

Semella suficiente, pois non é. Porque o amigo Bouzán aínda nos quixo sorprender un chisco máis. Agora, o equipo de novas tecnoloxías do cole artellou a montaxe de pizarras dixitais interactivas en todas as aulas do centro, en calquera soporte (paredes, pantallas de proxección, mesmo nunha mesa)... cun custo aproximado de ... 60€ cada unha!

Din que ninguén é profeta na súa terra. Pois non deixemos que sexa verdade en Galicia.

Parabéns amigo Bouzán e non deixes de sorprendernos.

Visita a páxina do colexio: http://centros.edu.xunta.es/ceipdepalmeira/
Crea recursos con ARDORA; http://www.webardora.net/

2008-01-13T20:19:00.000+01:00

Faltaba nesta bitácora un recuncho para as aportacións de todos/as vós. Pois ben, comezamos coa espléndida blogue de Román Landín. Segundo di Román, o seu proxecto aínda está verde. Pois ben, eu coido que de verde nada. Recoméndovos que lle deades unha ollada ao seu traballo. Creo que paga a pena.

Sexa como sexa, a partires de agora terá un lugar preferente neste cuaderno compartido. Teño para min que será de moito interese pasear pola súa páxina de cando en vez.

Velaí a dirección, e recordade: a partires de hoxe, no menú da dereita.

Caderno de lingua de Román. CPI don Aurelio

2008 ano das linguas

2008-01-11T16:44:00.000+01:00

En maio do pasado ano (si, pasado xa, falo do 2007... como pasa o tempo!) a Asemblea Xeral das Nacións Unidas proclamou este 2008 "Ano internacional dos idiomas", disque para fomentar o multilingüismo, a unidade e a comprensión internacional.

Semella que este ano dedicarase ás linguas, e resulta interesante esta atención á diversidade xunguida ao concepto de unidade. En España, os gobernos de Galicia, Euskadi e Cataluña veñen de proclamar a súa intención de artellar maneiras de incrementar o plurilingüismo na sociedade española.

Non adoito conceder moita trascendencia a celebracións deste tipo "días de... anos de..." mais dareille unha oportunidade a este "ano das linguas" no mundo. Trátase dun documento moi necesario, xa que sabemos que de entre as máis de seis mil linguas existentes no mundo, unha porcentaxe que supera a metade delas está en serio perigo de desaparecer para sempre.

A lingua dun pobo vai vencellada á súa esencia dun xeito singular. Poucas características culturais son tan evocadoras do que somos como a nosa lingua. Cando unha lingua desaparece, esváese con ela toda unha historia, un pequeno mundo feito de xeracións de homes e mulleres e todo o seu peculiar modo de sentir e comunicarse.

A morte dunha lingua é un oco na Historia.

Por iso, o seu recoñecemento, o seu reclamo, son motivo de ledicia, e de ilusión.

¿non vos parece?

Proxecto XOGAMOS?

2007-12-22T21:58:00.000+01:00

A Xunta xa colgou os traballos recentemente premiados nos "Recursos educativos para a Sociedade da Información 2007". Entre eles temos o "Proxecto XOGAMOS?":

Baixo o nome de Xogamos? agrúpanse unha serie de recursos informáticos adicados á elaboración e utilización de xogos de pregunta-resposta.

As ferramentas que inclúe para a creación de xogos son:

EdiPre: editor de preguntas. Programa informático para contornas windows e linux.
DEX: DEseño de Xogos. Aplicación para a construcción das interfaces gráficas dos xogos. Válida para contornas windows, linux , mac e Internet.
E por último Xoga é un script en flash que permite a utilización dos xogos en diversos sistemas operativos ademáis de Internet.

As potencialidades da ferramenta son moitas, pero como mostra podedes ver algúns dos exemplos que incluimos.

A páxina antonvicente.es xa está actualizada con esta nova ferramenta.

Máis premios para os nosos profes

2007-12-22T00:39:00.000+01:00

Coa sorpresa do premio de Antón e Felo non nos decatamos de que outro dos nosos profes (colaborador nestes cursos de galego) levara outro galardón. Nin máis nin menos que o primeiro premio na categoría de "Materiais curriculares web". O compañeiro Antonio Lomba, do IES A Sangriña. O seu traballo - que tendes na súa páxina como recurso educativo - e que se cadra vistes algúns de vós nas sesións do curso ten como título: "A auga: aplicacións enerxéticas na Galicia preindustrial". Este traballo enorme e dunha calidade técnica impecabel resultou da labor colaborativa dun seminario de creación de materiais no que colaboraba o noso outro profe de A Garda, o compañeiro Xavier Crespo, a quen tamén lle felicitamos por este premio.

Noraboa e parabéns para Antonio e de novo para nós por termos disfrutado da sorte de contar con estes magníficos profesores.

Premio para os nosos profes

2007-12-21T10:43:00.000+01:00

Temos premio. Premio para algúns dos nosos relatores de "galego-on-line". En particular o relator Felo Couto e o ubicuo Antón Vicente. Levaron outro recoñecemento para a súa incribel tarefa de creación de recursos en galego.
Os premios para "Recursos educativos para a sociedade da información" saíron publicados no DOG do día 18 e inclúen varias modalidades e materiais moi intersantes. Entre eles está este premio para "Ferramentas de autor" polo proxecto "Xogamos?" que algúns de vós tivestes ocasión de coñecer nos cursos de galego.
Parabéns para Toño e Felo e tamén para nós por terlles coñecido e poder contar coa súa colaboración.

Compromiso

2007-12-20T23:33:00.000+01:00

Podemos amosar a nosa solidariedade con Isaac Díaz Pardo. Se queres asinar o manifesto de apoio podes facelo enviando un correo co teu nome e apelidos e máis o DNI á seguinte dirección de correo electrónico: xmavera@hotmail.com

Velaí o texto do manifesto:

SE CALAMOS SEREMOS CÓMPLICES

Dende hai un tempo estamos asistindo a unha operación empresarial pola que se aparta a Isaac Díaz Pardo, da toma de decisións de Sargadelos, relegando así a aquel que fora alma mater e fundador das fábricas de Sargadelos e O Castro, creando con Luis Seoane ese emporio cerámico e cultural e converténdoo en sinal de identidade de Galicia. Falar de Sargadelos e O Castro é lembrar a labor dos exiliados, da unión da empresa e a cultura con base na tradición e o compromiso; é falar do home que traballou para manter a memoria da guerra e a represión cando ninguén o facía, da recuperación dos escritores que andiveron lonxe e remataron acollidos ao redor desa casa común, pero tamén dun home a quen sempre vimos traballando, facendo todo tipo de labores pois de ningunha delas se avergonzaba, e tanto cargaba paneis de exposicións na subida ao Museo do Pobo Galego, como deseñaba mobles e pergueñaba edificios que se recoñecen como seus. Neste momento, falar de Isaac é facelo de alguén traizoado polos seus -en palabras de Avelino Pousa Antelo- e Díaz Pardo debe ser o orgullo de todos os galegos de ben, moitos xa publicaron os seus escritos, outros fanlle homenaxes,... pero non debemos calar ata que se faga xustiza. ¡COMO CALAR...!

1. Ante o silencio público mesturado con informacións confusas.

2.Ante as institucións públicas que semellan mirar para outro lado.

3.Ante o paradoxo de que quen máis fixo pola recuperación da memoria histórica se atope en situación de silenciado neste momento de leis e anos conmemorativos.

4.Ante unha actualidade na que semella que o mundo da empresa establece os valores (o novo Sargadelos) e non hai ninguén que encabece a masa crítica desta sociedade civil disposta a defender a este home pero tamén a unha empresa que ha de estar por riba dos accionistas por ser xa case unha institución.

5.Ante a caída en picado dunha empresa que acaba de vender a súa tenda en Milán e vai facer outro tanto en Lisboa, cando nos representa a todos e non podemos deixar ao dispor duns accionistas que non se dan conta, de que o que se traen entre mans é algo que os galegos e galegas sentimos coma un proxecto cultural, unha representación do país que só pode ser de Isaac Díaz Pardo e de todos nós.

Por isto, necesitamos que alguén poña sentido no mundo empresarial, coloque os cartos no seu sitio e lidere este movemento de vontades para restaurar a xustiza cun dos nosos homes máis ilustres, cos mortos que o acompañaron neste empeño e co que hai de Galicia nese proxecto. Pedimos axuda aos avogados dispostos a argumentar e tramitar os papeis necesarios, aos políticos e deputados para xestionar as maneiras de resolver este conflito, aos intelectuais para opinar diante dos micrófonos e xornais, aos consumidores para demostrar o seu valor, é dicir, que cadaquén faga o posible para abrirlle os ollos á xustiza e poñer a cada un no seu sitio. Se seguimos calados seremos cómplices da inxustiza que se está realizando con Isaac Díaz Pardo e coa memoria cultural de Galicia. Tal vez teñamos que dicir que Isaac somos todos e todas nós defendendo, de novo a dignidade.

En Compostela a principios de decembro do ano 2007

Made in Galiza

2007-12-15T13:14:00.000+01:00

Un dos ponentes destas xornadas, Sechu Sende, obtén o Premio Ánxel Casal ao Libro do 2007. A súa obra "Made in Galiza" foi recoñecido como Libro galego do ano. Parabéns!!!

Máis información en: http://www.galiciae.com/nova/4000.html

Vivamos ....

2007-12-07T21:13:00.000+01:00

Drawing for Children

2007-12-06T19:16:00.000+01:00

Ola a todos os compañeiros e alumnos de este interesante curso. Unha vez máis invítovos a ver con calma a páxina que fixen para o cursiño pois pola premura de tempo non foi posible ver todo co detalle que pretendía. Como dixen durante as xornadas a idea é que se manteña pública durante polo menos dous anos con todas as melloras que sexamos quen de facer a partires de todo o que suxirades. Hoxe mesmo fixen un módulo co que podedes engadir máis imaxes vectoriais ao Drawing for Children (tede en conta que se a variades a ruta de instalación do programa C:\Archivos de programa\Drawing for Children , tamén tedes que variar a ruta de instalación do módulo).
Os novos temas de imaxes vectoriais que incluín son: Billetes de euro, Nadal, Alimentos, Verán, Flores, Celebracións e un novo cartafol de Animais.

RECURSOS

2007-12-04T21:10:00.000+01:00

Nas miñas sesións quedei de pasar enlaces a páxinas interesantes (sobre todo de inglés e frances) así que aquí tedes unha escolma.

http://www.edu.xunta.es/linguasestranxeiras/ (páxina da consellería con información sobre todos os programas de lingua)

Ediga (Encerado dixital Interactivo, recursos e actividades)

Inglés

http://www.childstoryhour.com/

Spot

Agendaweb

Madenglishouse (visita "friends" e atoparás moitos enlaces)

Multinglés

Francés

Françaventure

Francés primaria

http://ntic.org/accueil.php3?lang=fr (uso das Novas tecnoloxías en francés)

Recursos

http://www.leplaisirdapprendre.com/

Multilingüe

http://www.abcteach.com/

Páxina de Isabel Pérez

http://www.childtopia.com/

http://www.enchantedlearning.com/Home.html

http://clicknlearn.net/

Xa vos pasarei algunha máis.

Tamén quería recordar que xa está disponible unha nova versión de Tux Paint. Na sección de máxicas hai moitas novedades, botade unha ollada.

A miña presentación

2007-12-04T15:25:00.000+01:00

Se cadra foi moito rebumbio de cousas as que miramos, ahí van todos os enderezos. Xa sabedes que os que teñades conta de gmail, vos podo convidar a compartir ista presentación no Google Docs, avisade por correo fcouto@gmail.com e para o que vos poda botar unha man non dubidedes en preguntares.

Un prazer,

Abrir nunha nova ventana

Galegoxdocentes

2007-12-04T01:19:00.000+01:00

Benvidos/as

Esta blogue ten por obxecto dar continuidade ás experiencias desenvolvidas durante os cursos de galego para o profesorado en prácticas neste curso 2007-2008 no ámbito do CFR de Pontevedra.
Os diferentes relatores e relatoras que vos acompañaron nestas sesións e que presentaron un gran número de recursos para o ensino en galego fican aquí á nosa disposición. Poderemos afondar no descubrimento e no manexo destas ferramentas que poden resultar moi útiles.

Anímovos a que fagades comentarios ás entradas dos profes e vos poñades en contacto con elas e eles para tirar o máximo partido do seu magnífico traballo de recopilación, organización e mesmo creación de recursos educativos.

Douvos a benvida a todos e todas a este espazo virtual de consulta, colaboración e aprendizaxe.

Agardo que resulte de interese para nós e os nosos alumnos/as.

Descarga de vídeos en YouTube e outros.

2007-12-02T22:28:00.000+01:00

Nunha sesión, algén preguntoume como descargar os vídeos de Youtube e non lembraba o nome do programa para facelo. Con aTubeCatcher (programa gratuito) podes descargar vídeos dende varios portais(YouTube, Dailymotion, MySpace, Stage6 e Google) e convertelos a outros formatos.
Para descargar con aTube Catcher só tes que pegar a dirección do vídeo no campo correcto e seleccionar o formato de vídeo que queres utilizar.
Ademais, o programa inclúe outras opcións avanzadas para personalizar o proceso de conversión. Opcións para definir a calidade e resolución do vídeo, o formato da ventá (4:3 ou panorámico),…
A dirección para descargar o program,a é http://ytc.dsnetwb.com/video_software/